A Feira de Artesanía de A Ponte de Lóuzara, no municipio de Samos, reuniu este luns a preto de vinte expositores nunha xornada que atraeu a moito público ao enclave natural. O entorno, un souto, é un dos elementos distintivos desta feira que xa cumpre 17 edicións.
Os asistentes puideron adquirir unha ampla gama de produtos, desde alimentos como mel e doces, ata artigos de coiro, cadros ou xoiería. A nota musical púxoa o grupo Os Sureños, financiado pola Deputación de Lugo, e tamén houbo bailes tradicionais a cargo de veciños da zona.
A cita atraeu a xente de toda a comarca de Sarria e O Courel, moitos dos cales regresan cada verán a Lóuzara. Para quen quixo quedarse a comer, instalouse un servizo de pulpería e un posto de sidra.
A feira está organizada pola asociación Fonte da Cova, coa colaboración do Concello e a Deputación. O tenente de alcalde de Samos, José Antonio García Jurjo, mostrouse satisfeito coa acollida: "Empezamos case en broma e acabou sendo unha cousa moi seria que xunta moita xente, mesmo máis da que se esperaba".
