A Burga de Xermeade, en Teo, recuperou o seu esplendor trala finalización dos traballos de limpeza e selado. A intervención, executada pola cooperativa “Arbore arqueoloxía S. Coop, Galega”, centrouse na restauración da estrutura orixinal e na posta en valor deste ben cultural.
As tarefas incluíron o selado de fugas de auga e o encintado do frontal da fonte. Ademais, procederase ao baleirado do pilón/bañeira do século XVIII e á limpeza manual do enlousado de cantería para retirar o lodo acumulado dende a última intervención en 2022. Tamén se limpou e encintou a pedra central que servía de asento aos bañistas e de fito para a rede que cubría a bañeira.
Segundo crónicas antigas, o abade de San Martiño Pinario de Santiago sufragou este centenario pilón para que a veciñanza puidese aproveitar as súas augas mineromedicinais. A intervención actual permite volver observar a fábrica orixinal desta construción histórica.
A equipa de Arbore arqueoloxía, con experiencia neste tipo de restauracións de bens culturais, levou a cabo os traballos con "magnífico resultado", segundo fontes municipais.
