A colaboración entre a Universidade de Santiago de Compostela (USC) e a federación EAPN Galicia - Rede Europea contra a Pobreza e a Exclusión Social materializarase en actividades conxuntas. O acordo foi selado pola reitora, Rosa Crujeiras, e a presidenta de EAPN Galicia, Ana Pardo Fernández.
Entre as iniciativas previstas atópanse proxectos de investigación e desenvolvemento entre os institutos e centros de ambas as entidades e as 36 organizacións membro de EAPN Galicia. Tamén se organizarán accións formativas, informativas e de sensibilización dirixidas á comunidade universitaria para promover a tolerancia, o respecto e a erradicación de discursos de odio, aporofobia ou exclusión social. Ademais, buscarase facilitar o fluxo de información coas organizacións do Terceiro Sector de Acción Social, fomentando a formación, implicación e empregabilidade do estudantado.
Esta cooperación permitirá afondar na análise da realidade da pobreza e a exclusión social, identificando as súas causas e propoñendo vías de incidencia e defensa dos dereitos humanos e a xustiza social. Promoveranse estudos, investigacións, xornadas, seminarios e foros de reflexión.
Outras accións a desenvolver, mediante convenios específicos, inclúen o fomento da participación e o voluntariado do estudantado, profesorado e persoal técnico, así como o deseño e implantación de proxectos de aprendizaxe servizo.
