A elección produciuse tras a celebración do Demo Day do programa, onde oito compañías presentaron as súas propostas ante representantes de fondos de investimento especializados no ámbito da saúde. TraffikGene desenvolve no CiQUS unha plataforma tecnolóxica baseada en transportadores peptídicos para a administración dirixida de terapias baseadas en ácidos nucleicos, optimizando as súas propiedades mediante unha tecnoloxía química patentada.
A selección destaca polo elevado nivel de participación, con máis de 235 candidaturas en innovación en saúde. BStartup Health, na súa novena edición, apoia empresas emerxentes nas fases temperás, facilitando investimento e acceso a redes especializadas. Dende a súa posta en marcha impulsou máis dunha vintena de iniciativas empresariais biomédicas.
A presenza de TraffikGene entre as finalistas supón un recoñecemento ao potencial de transferencia do coñecemento xerado no CiQUS, centro con selo María de Maeztu e recoñecemento CIGUS da Xunta de Galicia. A selección fai a TraffikGene elixible para recibir investimento de Sabadell Venture Capital.
