Sara Hermo Alonso coa obra ‘Ocupación vixiada’ acadou o Premio Carlos Valcárcel á mellor fotografía proposta pola organización, dotado con 350 euros, trofeo e diploma. Pola súa parte, Francisco Javier Lanseros García con ‘Fragmento urbán’ obtivo o Premio Eduardo Ochoa á mellor fotografía de tema libre, dotado con 300 euros, trofeo e diploma.
O Premio do Público resolveuse en empate para as obras ‘Casas’ de Sara López Temes e ‘Dúplex con vistas ao Miño. Búscase compañeiro de piso’ de Esther López.
A entrega de galardóns estivo presidida pola vicerreitora de Cultura, lingua e Patrimonio, Ana Cabana Iglesia. Tamén participaron Iria Castro Fernández, deputada provincial de Cultura; Javier Vázquez Prado, concelleiro de Cultura e Educación do Concello de Lugo; e o coordinador do certame, Eduardo Ochoa.
O xurado estivo composto por Eduardo Rodríguez Ochoa (coordinador e presidente), María Teresa Díaz Valcárcel (especialista en fotografía), Adrián Vázquez Rodríguez (fotógrafo) e Paloma Lugilde Rodríguez (secretaria sen voto).
Ademais, unha ducia de traballos presentados integran unha mostra que se pode visitar na Biblioteca ata o 14 de decembro. A iniciativa enmárcase no convenio Lugo Cultural, financiado pola USC, Cultura e Turismo do Concello de Lugo e a Vicepresidencia da Deputación Provincial de Lugo.
