O titular do Goberno galego sinalou durante unha sesión de control no Parlamento que a vivenda é "a primeira preocupación dos galegos" e que a Xunta traballa para resolvelo "con máis axilidade, menos burocracia e máis eficacia".
Rueda lembrou o compromiso da Xunta de duplicar o parque público de vivenda, pasando de 4.000 a 8.000 antes de que remate 2028, co obxectivo de alcanzar as 10.000 unidades no ano 2030. Destacou que as 4.000 vivendas xa están en marcha.
Ademais, o presidente mencionou outras iniciativas autonómicas para mellorar a situación da vivenda, como o desenvolvemento de chan para vivenda protexida, a creación de Proxectos de Interese Autonómico residenciais, a ampliación ata os 45 anos da idade máxima para os avais da primeira vivenda, a rebaixa da fiscalidade e a conversión de baixos baleiros en vivendas habitables. Tamén se referiu ao plan Fogar Vivo para reformar e poñer no mercado inmobles baleiros.
