O presidente da Xunta, Alfonso Rueda, reuniuse esta semana co presidente de Microsoft España, Paco Salcedo, na capital galega. O encontro, enmarcado na visita do directivo de Microsoft a Galicia, centrouse en analizar posibles ámbitos de colaboración en transformación dixital, intelixencia artificial e desenvolvemento tecnolóxico.
Na xuntanza, á que tamén asistiu o conselleiro de Facenda e Administración Pública, Miguel Corgos, analizáronse liñas de traballo entre a Axencia para a Modernización Tecnolóxica de Galicia (Amtega) e a compañía tecnolóxica. Entre os temas abordados atopábase a aplicación de ferramentas de intelixencia artificial na Administración autonómica, o desenvolvemento de infraestruturas de datos en Galicia e a incorporación do galego ás ferramentas de IA da empresa.
Tamén se discutiron posibles iniciativas relacionadas coa formación en intelixencia artificial responsable e a aplicación destas tecnoloxías no ámbito educativo, en liña coas actuacións que a Xunta está a impulsar para avanzar na dixitalización e no desenvolvemento de competencias tecnolóxicas na comunidade.
