O certame, dirixido a fomentar a creatividade e a expresión en lingua galega entre a mocidade universitaria, recoñeceu tamén a Irene Lens Fernández co segundo premio por ‘Notas a pé da obsesión’ e a Claudia Romero Dorna co terceiro por ‘Emocións perigosas’. Ademais, outorgouse un accésit a Laura Martínez Blanco por ‘Tuntún’.
A cerimonia de entrega, celebrada este xoves 22 na Facultade de Filoloxía, estivo presidida pola vicerreitora de Cultura, Lingua e Patrimonio, Ana Cabana Iglesia. Tamén participaron o decano do centro, Elias Feijó; a vicedecana Elsa González; o secretario xeral da Lingua da Xunta de Galicia, Valentín García; e os profesores Xosé Manuel Antonio Salgado e Carlos Pérez Valela. A xornada estivo amenizada pola actuación musical de Zeltia Irevire e contou coa intervención da escritora Chus Pato, Premio Nacional de Poesía 2024.
A Comisión de Normalización Lingüística da Facultade de Filoloxía organiza anualmente este concurso co obxectivo de impulsar a creatividade xuvenil e descubrir novos talentos literarios en galego. Poden participar estudantes de grao, mestrado e doutoramento da USC, así como o persoal investigador contratado da universidade.
Os premios consisten en tres dotacións económicas: 600 euros para o primeiro clasificado, 500 euros para o segundo e 400 euros para o terceiro.
