O titular do departamento educativo da Xunta sinalou que, ademais de diferentes medidas de reforzo e apoio, o obxectivo principal desta iniciativa é impulsar o afianzamento das competencias lectora e matemática entre o alumnado, concretamente a través do programa Avanza Matemáticas.
Esta iniciativa, dirixida ao alumnado de Primaria de centros que máis o precisen, busca fixar conceptos básicos e mellorar a resolución de problemas, o razoamento e a capacidade de cálculo. Actualmente, trabállase coa Asociación Galega de Profesorado de Educación Matemática (Apagema) e co Centro Autonómico de Formación e Innovación (CAFI) para o seu desenvolvemento.
Ademais, dentro do Marco de impulso, o Programa de reforzo educativo extraescolar para 6º curso de Educación Primaria tamén fai fincapé no reforzo desta competencia cando os alumnos están a piques de cambiar de etapa educativa.
No marco do encontro, o conselleiro reuniuse con dous dos relatores, Alessandro Maccarrone, doutor en Física Teórica e autor do libro O infinito placer das matemáticas, e Pablo Beltrán-Pellicer, profesor titular de Didáctica das Matemáticas e creador do blog Terra de números. Rodríguez felicitou a ambos pola súa contribución á divulgación e á didáctica das matemáticas desde unha perspectiva lúdica.
A xornada formativa, dirixida a docentes de Infantil e Primaria, busca achegarlles coñecementos e ferramentas para deseñar actividades prácticas e contextualizadas, aplicar estratexias metodolóxicas e elaborar materiais que favorezan o desenvolvemento da competencia matemática. Inclúe charlas e obradoiros sobre materiais manipulativos, novas tecnoloxías como a realidade aumentada e o pensamento computacional.
Participan representantes de colexios, institutos, universidades (Santiago de Compostela, A Coruña, Complutense de Madrid, Zaragoza), do Centro de recursos pedagóxicos específicos de apoio á innovación e á investigación educativa (Barcelona) e do Museo de Matemáticas de Cataluña. Tamén intervén unha mesa de diálogo con outros profesionais como Clara Isabel Grima Ruiz (Universidad de Sevilla) e José Ángel Murcia Carrión (Universidad Complutense de Madrid).
