A secretaria xeral técnica da Consellería de Sanidade, Natalia Lobato, e a directora xeral de Recursos Humanos do Servizo Galego de Saúde, Mar Pousa, supervisaron as probas, que abranguen categorías como médico xeral da Axencia de Doazón de Órganos e Sangue (ADOS), farmacéutico de atención primaria, odontólogo de atención primaria, técnico en xestión de sistemas e tecnoloxías da información e calefactor.
En concreto, a categoría de médico xeral de ADOS tivo 27 de 34 admitidos; farmacéutico de atención primaria, 546 de 655; odontólogo de atención primaria, 164 de 196; técnico en xestión de sistemas e tecnoloxías da información, 74 de 104; e calefactor, 144 de 181.
O Servizo Galego de Saúde oferta un total de 6 prazas para médico xeral de ADOS, 31 para farmacéutico, 8 para odontólogo, 9 para técnico en xestión de sistemas e 7 para calefactor.
Ademais, desde as 16,00 horas deste sábado, 7.800 persoas están chamadas para as probas de acceso á categoría de celador, para as que se ofertan 348 prazas.
A xornada de exames concluirá este domingo, 15 de novembro, coas probas para médico asistencial do 061 (139 admitidos para 8 prazas), terapeuta ocupacional (273 admitidos para 11 prazas), dietista-nutricionista (363 admitidos para 45 prazas) e electricista (427 admitidos para 11 prazas). Durante este outono, a Xunta organiza probas para un total de 2.223 prazas.
