A directora xeral de Desenvolvemento Pesqueiro, Ángeles Vázquez Suárez, presidiu a sesión ordinaria da Rede entre o sector pesqueiro e a comunidade científica de Galicia (Redemar), celebrada de xeito telemático o pasado 16 de outubro de 2026. O obxectivo da xuntanza técnica foi analizar e valorar as iniciativas presentadas por entidades de investigación, universidades e o propio sector marítimo-pesqueiro para fortalecer a xestión sustentable e o coñecemento dos recursos mariños.
No encontro, deuse luz verde á selección de tres proxectos de investigación aplicada de carácter estratéxico. A iniciativa Mariskeo busca solucións compartidas para mellorar o marisqueo a pé coa integración da Federación Provincial de Confrarías de Pontevedra, a Universidade de Vigo e o CSIC. Tamén se aprobou Monimar-27, liderado polo CIMA, CETMAR e a Federación Galega de Confrarías de Pescadores, que dá continuidade ao proxecto Ecosistémica24 para manter e afondar nas series históricas de datos do marisqueo. Por último, aprobouse Calimar-2, desenvolvido pola Universidade de Santiago de Compostela (USC), para estudar a produtividade en diversos enclaves costeiros.
A aprobación destas propostas permitirá axilizar a súa tramitación mediante anticipado de gasto, para que os equipos investigadores e o sector poidan comezar a traballar a principios de ano. O resto de proxectos remitidos nesta convocatoria serán analizados na vindeira reunión ordinaria, prevista para comezos do ano 2027.
Así mesmo, acordouse a aprobación de cinco solicitudes de modificación e prórroga de iniciativas en execución activa. Entre elas figuran as ampliacións de Ostreares (recuperación da ostra plana na enseada de San Simón) e Resalber (marcadores moleculares de resistencia á salinidade no berberecho), ambas desenvolvidas polo Centro de Investigacións Mariñas de Galicia (CIMA). Tamén se autorizou a continuidade de Zamfer (avaliación da zamburiña na ría de Ferrol) e axustes técnicos nos proxectos Bivalfood (alimentación de bivalvos en San Simón) e Algasdet (detección precoz da alga invasora Rugulopteryx okamurae).
Ángeles V. Suárez destacou que as propostas seleccionadas responden ás necesidades reais dos profesionais do mar, evitando duplicidades e priorizando investigacións con aplicación práctica inmediata sobre o tecido produtivo costeiro galego.
