Carmen García Rodríguez, graduada en Enfermaría pola USC e titulada no Máster en Atención Sanitaria, Xestión e Coidados, foi galardoada co ‘Premio Enfermería Joven al Mejor Trabajo Fin de Grado 2025’. Este premio forma parte dos galardóns estatais de investigación Ciudad de Sevilla, organizados polo Ilustre Colegio Oficial de Enfermería (ICOES).
O traballo premiado, titulado ‘Materiales didácticos innovadores para la formación a escolares en el uso del desfibrilador externo semiautomático’, foi dirixido polos docentes da Facultade de Enfermaría Aida Carballo Fazanes e Antonio Rodríguez Núñez. A investigación analiza a efectividade de materiais didácticos adaptados ao alumnado escolar, como o crebacabezas mecánico tridimensional DESA-Cube e o vídeo guiado DESA-Vídeo, para a formación no uso do desfibrilador externo semiautomático (DESA).
No estudo participaron 282 escolares. Os resultados revelaron un bo nivel de aprendizaxe xeral, superando o 80% dos participantes a correcta execución da maioría dos pasos recomendados. Observouse tamén que o grupo que utilizou o vídeo guiado obtivo mellores resultados no inicio inmediato da reanimación cardiopulmonar.
“"Os resultados apuntan a que estes materiais adaptados ao desenvolvemento cognitivo dos escolares poden constituír alternativas viables e efectivas á formación tradicional, aínda que determinadas habilidades requiren reforzo independentemente da metodoloxía empregada."
Carmen García Rodríguez continúa a súa liña de investigación na USC, onde está a cursar un programa de doutoramento en Investigación Clínica en Medicina. Ademais, colabora co grupo de investigación CLINURSID da USC. Actualmente, estanse a avaliar os efectos a longo prazo desta intervención formativa nove meses despois da súa realización inicial.
