A presidenta de Portos de Galicia, Natalia Botana, mantivo esta mañá unha reunión co presidente da asociación Marinas de Galicia, José Manuel García, quen tamén é director do porto deportivo de Sadamar, en Sada. O encontro celebrouse na sede do ente público en Santiago de Compostela.
Botana presentou os detalles dos procedementos incorporados á sede electrónica, deseñados para acelerar a tramitación das actividades comerciais e industriais que se desenvolven nos peiraos autonómicos.
Explicou que Portos de Galicia habilitou dous novos procedementos en sede, mediante formularios específicos (IF510A e IF510B), que substitúen o anterior formulario xenérico PR004A. Estes novos formularios están pensados para solicitudes de autorización de actividades que non requiren uso exclusivo do solo, pero que se desenvolven en dominio público portuario en paralelo a outras actividades.
Estes trámites son para pequenas empresas ou autónomos que realizan tarefas puntuais como reparacións, gravacións, ou distribución, entre outras.
