O presidente da Xunta, Alfonso Rueda, mantivo esta semana un encontro coa presidenta da Asociación Galega de Axencias de Viaxes (Agavi), Mar Rodríguez Meseguer, e outros representantes da entidade. No encontro, coñecéronse as súas propostas para apoiar o sector, entre as que se atopa o impulso á dixitalización, considerada clave para a modernización das empresas e a súa adaptación ás novas dinámicas.
Na xuntanza, na que tamén participou o director de Turismo de Galicia, Xosé Merelles, o presidente autonómico salientou o pulo que suporá para o tecido empresarial galego a celebración do Xacobeo 2027. Destacou que as axencias de viaxes xogarán un importante papel neste evento.
A Xunta busca posicionar Galicia como un destino turístico competitivo, sostible e atractivo durante todo o ano, valorizando a súa oferta natural, cultural, patrimonial e gastronómica. Neste contexto, subliñouse a contribución das axencias de viaxes na comercialización dos produtos e destinos turísticos galegos, así como na recepción e acollida de viaxeiros.
