A exposición, impulsada pola Asociación Cultural e Pedagóxica Ponte… nas Ondas! (PNO), permanecerá aberta ata o vindeiro 20 de novembro. No acto inaugural interviñeron Ana Cabana Iglesias, vicerreitora de Cultura, Lingua e Patrimonio da USC; Ángel Miramontes, director xeral de Patrimonio Cultural da Xunta de Galicia; e Santiago Veloso, presidente de Ponte… nas Ondas!.
A proposta concíbese como unha experiencia participativa que permite escoitar, ver e interactuar coa memoria cultural galego-portuguesa a través de códigos QR, arquivos sonoros e videográficos, ilustracións e unha pantalla táctil. O relato arrinca o 29 de marzo de 1995, cando dezaseis escolas das dúas beiras do Miño celebraron a inauguración da ponte internacional entre Salvaterra e Monção cunha xornada histórica de doce horas de radio escolar.
A mostra detalla a evolución daquel proxecto, desde as primeiras antenas colgadas nun pau e as cintas de casete, ata a primeira emisión por Internet en 1997 e o actual concepto “radiovisual”. O obxectivo pedagóxico sempre foi que “o patrimonio entrase nas aulas para que a rapazada deixase de ser receptora da información e tomase a palabra diante dos micrófonos”, explicou Santiago Veloso.
O percorrido tamén dá conta da intensa actividade editorial, musical e escénica da asociación, así como da súa reivindicación dunha cultura común sen fronteiras. Un esforzo colectivo que tivo un dos momentos clave en 2004 coa Candidatura do Patrimonio Inmaterial Galego-Portugués á UNESCO, impulsada desde as propias escolas de ambos países.
Fiel á filosofía de PNO! de aprender facendo, a mostra complétase cun pequeno set de radio instalado na Capela da Universidade. Neste espazo, o estudantado dos centros educativos que visiten a exposición ata o 20 de novembro participará en obradoiros prácticos nos que gravarán os seus propios podcasts arredor do patrimonio.
