O festival desenvolverase ao longo de catro fins de semana e ofrecerá unha programación variada na que convivirán a comedia de situación, o humor absurdo, a sátira social e as historias vinculadas á memoria e á cultura popular galega. A iniciativa busca achegar as artes escénicas á cidadanía e favorecer o encontro entre o público e as compañías participantes, consolidando unha programación teatral estable durante o mes de novembro.
A programación comezará o sábado 7 de novembro coa representación de García, un cadáver informal, de Gargallada Teatro. O domingo 8 de novembro será a quenda de Muros rotos, da compañía Oreteiro Teatro. O domingo 15 de novembro, a agrupación teatral Silvardeiras presentará Tal carro vai como estadullos leva. O sábado 21 de novembro, Coles-Teatro levará ao escenario Pepa Loba. O domingo 22 de novembro chegará Tarascones, de Sofá Malva. Finalmente, o sábado 28 de novembro, o festival despedirase coa representación de Ai Pedro.
Todas as representacións terán lugar no Auditorio Municipal de Verín ás 19:30 horas, cunha achega de 5 euros por función. As entradas poderán adquirirse de maneira anticipada no establecemento Carlin de Verín. Coa celebración desta nova edición, La Caja de Pandora continúa impulsando unha iniciativa que contribúe á difusión das artes escénicas e á dinamización da actividade cultural da vila. O Concello de Verín reafirma o seu apoio ás iniciativas culturais promovidas polo tecido asociativo local.
