O Festival Internacional Galicreques celebrará do 10 ao 18 de outubro a súa 31ª edición cun cartel que inclúe unhas 50 funcións a cargo de compañías e artistas procedentes de nove países. A cita, organizada pola Asociación Barriga Verde, conta cun ano máis co apoio da Xunta de Galicia, que achega 37.210 euros a través da convocatoria de subvencións a festivais profesionais de artes escénicas.
O director da Axencia Galega das Industrias Culturais, Jacobo Sutil, participou na presentación da programación, onde salientou a consolidación de Galicreques como unha cita de referencia para o teatro de monicreques, capaz de conectar a creación galega con compañías e profesionais de distintos países.
O apoio da Consellería de Cultura, Lingua e Xuventude ao festival enmárcase na liña de axudas da Xunta de Galicia para festivais profesionais de artes escénicas, que en 2026 distribúe 290.000 euros entre 13 citas especializadas en teatro, monicreques, circo, danza, improvisación e monólogos.
A dimensión internacional será un dos principais eixos desta edición, coa participación de formacións chegadas de Chile, O Uruguai, Italia, O Brasil, A Arxentina, Colombia, O Salvador e India, ademais de compañías galegas e doutras Comunidades Autónomas.
O titiriteiro indio Dadi Pudumjee, unha referencia mundial do teatro de monicreques contemporáneo, recibirá o Premio Galicreques 2026 o domingo 18 de outubro e ofrecerá unha clase maxistral ese mesmo día.
A programación formativa inclúe tamén o curso 'L'arte della maschera', centrado na arte da máscara, impartido pola compañía italiana Zaches Teatro os días 15 e 16 de outubro.
A presenza galega no festival estará representada por seis propostas: Espagueti Títeres, Mircromina Títeres, Teatro Escena, Uxía Algarra, Títeres Alakrán e Marcos PTT. Esta última compañía estreará a peza 'Vila' o 17 de outubro no Salón Teatro.
O festival combinará funcións para público xeral e escolar, actividades de rúa e propostas formativas en 16 espazos de Santiago, con especial protagonismo da Alameda e o Teatro Principal. Destaca tamén 'CaraBé', unha liña específica dedicada á vertente adulta do teatro de monicreques, e a exposición 'Marionetas do Mundo' de Títeres Cachirulo na Biblioteca Ánxel Casal.
