O ensaio desenvolverase este sábado e domingo no Hospital Universitario da Coruña, no Hospital Comarcal Virxe da Xunqueira de Cee, no Hospital Clínico Universitario de Santiago de Compostela, no Hospital Comarcal de Barbanza, no Hospital Arquitecto Marcide, no Hospital Lucus Augusti (HULA), no Hospital Comarcal da Mariña, no Hospital Comarcal de Monforte, no Complexo Hospitalario Universitario de Ourense (CHUO), no Hospital Comarcal de Verín, no Hospital Comarcal de Valdeorras, no Hospital Público Álvaro Cunqueiro, no Hospital Provincial de Pontevedra e no Hospital Comarcal do Salnés.
A Xunta informou á poboación seleccionada mediante mensaxes SMS, indicando que se pode acudir aos centros hospitalarios sen cita previa en horario de 9:00 a 14:00 e de 15:00 a 21:00 horas. Esta posibilidade manterase ata o próximo fin de semana do 21 e 22 de novembro.
Ademais, de luns a venres, ampliouse o número de centros de saúde colaboradores ata os 69, distribuídos nas sete áreas sanitarias de Galicia. Ata o xoves, xa participaron no ensaio 15.635 persoas.
O obxectivo do ensaio clínico Combogal é comprobar se unha vacina combinada fronte á gripe e á covid reduce o risco de hospitalización, complicacións e morte asociadas a estas infeccións, en comparación coa administración simultánea dunha vacina antigripal de alta dose e outra fronte á covid en inxeccións separadas. A vacina combinada xa foi testada e autorizada, polo que o estudo busca determinar a estratexia de protección máis axeitada para a poboación maior.
As persoas interesadas en participar poden reservar cita a través da aplicación Sergas Móbil ou no teléfono 900 842 217, operativo de 10:00 a 20:00 horas.
