A proposta, promovida pola Cátedra de Arqueoloxía e Educación Patrimonial (impulsada pola Universidade da Coruña xunto co Concello de Ferrol e financiada pola Fundación L. Monteagudo), busca fomentar a aprendizaxe práctica sobre o pasado histórico. O alumnado de 3º de Educación Primaria do Colegio Belén de Ferrol participou no laboratorio “As pegadas do barro”, onde elaboraron pezas de cerámica inspiradas no Castro de Esmelle. Pola súa banda, alumnos de 1º de Educación Primaria do Colegio Arenales Compañía construíron un poboado castrexo no laboratorio “Construímos un poboado castrexo”.
Estes obradoiros prácticos contribúen á creación do Museo Colectivo Castrexo, un espazo expositivo que medrará coas achegas dos participantes. A programación continuará a próxima semana con novas sesións dirixidas a outros cursos do Colegio Belén de Ferrol.
Os “Laboratorios Castrexos” inclúen tres actividades gratuítas para centros educativos de toda Galicia: “Construímos un poboado castrexo” (1º e 2º de Primaria), “As pegadas do barro” (3º a 6º de Primaria e 1º da ESO) e “As orixes da moda” (5º e 6º de Primaria e 1º da ESO), que se incorporará proximamente. Cada laboratorio ten unha duración estimada de 90 minutos e oferta un máximo de 25 prazas.
A organización destes laboratorios non segue un calendario fixo, senón que se adapta ás solicitudes dos centros educativos e á dispoñibilidade de espazos no Campus Industrial de Ferrol. A participación é gratuíta e está aberta a centros de toda Galicia. Os interesados poden solicitar máis información chamando ao 881 013 820 ou escribindo a arqueodromo.ferrol@gmail.com.
