O Centro Singular de Investigación en Medicina Molecular (CiMUS) da Universidade de Santiago de Compostela (USC) está á fronte do proxecto europeo InnovaRTBRAIN (Innovative Radiotherapy for Brain Tumours). Esta iniciativa, financiada polo programa Marie Skłodowska-Curie Doctoral Networks da Unión Europea, ten como obxectivo transformar os procedementos actuais de tratamento de tumores cerebrais, deseñando novos enfoques de radioterapia máis precisos, efectivos e seguros.
A rede InnovaRTBRAIN, cunha duración de catro anos, une a universidades, centros de investigación, hospitais e empresas tecnolóxicas de varios países europeos. O proxecto integra a profesionais da física médica, bioloxía, enxeñaría e oncoloxía radioterápica para avanzar en novas opcións terapéuticas fronte ao glioma, un dos tumores cerebrais máis agresivos e complexos.
Entre as entidades participantes atópanse recoñecidos centros como o DKFZ German Cancer Research Center, a Universidade de Antwerp, o Institut Necker Enfants Malades, a Universidade de Oslo, a Universidade de Pavia, así como empresas como VARIAN medical systems, Batea Oncology ou Xstrahl.
O proxecto busca comprender mellor a resposta dos tumores á radiación e trasladar rapidamente ese coñecemento a novas estratexias terapéuticas, combinando investigación básica, desenvolvemento tecnolóxico e aplicación clínica. Apostarase por tecnoloxías innovadoras como a irradiación espacialmente fraccionada, a terapia FLASH, a protonterapia ou a terapia alfa dirixida, co fin de aumentar a eficacia do tratamento e reducir o dano en tecido san.
Ademais, InnovaRTBRAIN explorará estratexias baseadas na interacción entre radiación e inmunidade, incluíndo o estudo da resposta do sistema inmune e o desenvolvemento de terapias combinadas, como a integración con inmunoterapia ou terapias celulares.
Unha parte fundamental do proxecto é a formación dunha nova xeración de científicos con competencias en investigación, innovación e emprendemento na oncoloxía radioterápica. Financiaranse 14 contratos predoctorais distribuídos entre as institucións participantes, abarcando áreas como novas modalidades de radioterapia, inmunoterapia, terapias celulares CAR-T, dosimetría avanzada, imaxe médica, análise multiómico e bioloxía do microambiente tumoral.
Actualmente, a rede mantén aberto o proceso de selección para varias das categorías predoctorais ofertadas, ofrecendo oportunidades de formación e investigación en radiobioloxía, inmunoloxía, física médica, bioinformática ou enxeñaría biomédica.
O obxectivo final de InnovaRTBRAIN é mellorar a calidade de vida dos pacientes con tumores cerebrais, ofrecendo tratamentos máis efectivos e con menos efectos secundarios, ademais de acelerar a transferencia de coñecemento cara ao ámbito clínico e industrial.
O CiMUS, dedicado á investigación de vangarda en enfermidades crónicas, organiza a súa actividade en dous programas: Mecanismos Moleculares das Enfermidades e Integrativo Traslacional. É un centro colaborativo recoñecido pola Xunta de Galicia e cofinanciado pola Unión Europea a través do Programa Galicia FEDER 2021-2027, ademais de ser acreditado como Unidade de Excelencia María de Maeztu polo Ministerio de Ciencia, Innovación e Universidades.
