A iniciativa Ciencia Singular, que cumpre unha década desde a súa creación en 2017, ofrece á cidadanía a oportunidade de coñecer de preto o traballo que desenvolven centos de investigadores e investigadoras da USC. Abrangue áreas como a química, as tecnoloxías intelixentes, a medicina molecular, a física de partículas e as tecnoloxías ambientais, destacando a aplicación práctica do coñecemento científico.
A través de obradoiros interactivos, experimentos, visitas guiadas e charlas divulgativas dirixidas a maiores de 6 anos, Ciencia Singular busca transmitir a importancia da investigación que se realiza nestes centros de referencia, fomentar o interese pola ciencia e espertar vocacións científicas desde idades temperás.
Nesta edición participan o Centro Singular de Investigación en Medicina Molecular e Enfermidades Crónicas (CiMUS), o Centro Singular de Investigación en Química Biolóxica e Materiais Moleculares (CiQUS), o Centro Singular de Investigación en Tecnoloxías Intelixentes (CiTIUS), o Centro de Investigación Interdisciplinar en Tecnoloxías Ambientais (CRETUS) e o Instituto Galego de Física de Altas Enerxías (IGFAE). Estes centros forman parte da Rede CIGUS, apoiada pola Unión Europea (Feder Galicia 2021-2027).
As inscricións abriranse o xoves 15 de outubro ás 16:00 horas. Desde as 12:00 do mesmo día, os interesados poderán acceder ao formulario para cubrir os seus datos con antelación, agardando á apertura oficial do rexistro para envialo. O programa completo de actividades e horarios está dispoñible na web de Ciencia Singular.
