A unidade teatral da Xunta de Galicia inicia así unha nova etapa de colaboración co Teatro Nacional São João, froito do acordo de cooperación asinado o pasado 17 de abril. A montaxe, que revisita o clásico de Gil Vicente escrito en 1517, poderá verse na cidade portuguesa ata o 13 de decembro.
A estrea en Porto, á que asistiu o director da Axencia Galega das Industrias Culturais, Jacobo Sutil, foi dirixida pola creadora galega Marta Pazos. A produción do CDG e o Teatro Nacional São João fortalece os vínculos culturais entre Galicia e o Norte de Portugal e busca a proxección exterior das artes escénicas galegas.
O convenio establece un marco estable de colaboración durante catro anos para impulsar proxectos de creación, produción e exhibición teatral, así como iniciativas de formación e intercambio profesional. A cooperación inclúe a circulación de espectáculos e a programación recíproca.
A proposta escénica combina teatro, danza e artes visuais cunha lectura colorista e luminosa que recupera a dimensión popular da obra. Conta coa coreografía de Victor Hugo Pontes, a escenografía de F. Ribeiro, o vestiario de Agustín Petronio e a composición musical e sonoplastia de Hugo Torres, cun elenco de doce intérpretes.
Tras a súa exhibición en Porto, 'Auto da Barca do Inferno' chegará ao Auditorio de Galicia en Santiago de Compostela os días 16 e 17 de xaneiro de 2027. O espectáculo, en portugués con subtítulos en inglés, ten unha duración aproximada de 90 minutos e inclúe funcións con audiodescrición e lingua de signos portuguesa.
