O acto, presidido polo rei Felipe VI, contou coa presenza da reitora da USC, Rosa M. Crujeiras. A Ángel Carracedo, Premio Nacional de Investigación Gregorio Marañón na área de Medicina e Ciencias da Saúde, recoñéceselle a súa traxectoria na medicina forense e xenómica. A Carmen Álvarez, Premio Nacional de Investigación Blas Cabrera na área de Ciencias Físicas, dos Materiais e da Terra, concédeselle pola súa traxectoria en ciencia dos materiais biomédicos.
Durante o evento, o profesor Carracedo destacou a importancia da divulgación científica, afirmando que o persoal científico "debe esforzarse por comunicar o que fai" debido ao crucial vínculo entre ciencia e sociedade. Pola súa banda, a profesora Álvarez fixo fincapé na "curiosidade e na perseveranza", subliñando que escoitar outras perspectivas favorece a colaboración entre distintos ámbitos do coñecemento.
Estes galardóns recoñecen o mérito de investigadores españois cunha destacada traxectoria. A ministra Diana Morant sinalou que tamén "poñen de manifesto a fortaleza do sistema público de ciencia, que impulsa o talento, fomenta a excelencia e sitúa España entre os países que lideran a investigación internacional".
Carmen Álvarez Lorenzo (Santiago de Compostela, 1970) é catedrática de Farmacia e Tecnoloxía Farmacéutica na USC e conta cunha extensa investigación en sistemas de administración de fármacos e medicina rexenerativa, con máis de 300 artigos publicados e unha vintena de patentes.
Ángel Carracedo (Santa Comba, 1955) é un xenetista recoñecido internacionalmente polas súas investigacións en xenética do cancro, enfermidades psiquiátricas e farmacoxenómica. Dirixiu o Instituto de Medicina Legal da USC, situándoo á vangarda da medicina forense a través da xenética molecular.
