A Xunta de Galicia, da man da Asociación para a promoción de actividades de integración sociolaboral en centros especiais de emprego (Aspais), busca seguir avanzando na inserción laboral e na mellora da calidade do emprego en beneficio das persoas con discapacidade. Así se puxo de manifesto na xuntanza mantida entre a secretaria xeral de Emprego e Relacións Laborais, Susana Pérez Iglesias, e o presidente de Aspais, Ramón Dourado, celebrada en Santiago de Compostela o pasado 29 de agosto de 2026.
Na reunión tamén participou a directora xeral de Traballo Autónomo e Economía Social, Marta Mariño. As representantes autonómicas destacaron o papel de Aspais como representante do movemento asociativo da discapacidade e como socia da Rede Eusumo, unha iniciativa impulsada pola Xunta para dar visibilidade e impulso á economía social.
Neste contexto, recordaron que Galicia está a executar a segunda Estratexia Galega de Economía Social, cun horizonte ata 2027, co obxecto de reforzar a presenza desta fórmula económica en sectores emerxentes como o tecnolóxico, o industrial ou o verde.
