Na súa intervención, Clavel destacou os programas Adestra a Túa Saúde, dirixido a persoas maiores de 60 anos, e a plataforma DAFIS, para avaliar a condición física da poboación escolar, como exemplos de colaboración entre profesionais sanitarios e do deporte. O encontro subliña o crecente interese do sector do fitness por colaborar cos sistemas de saúde, acreditando os beneficios da práctica regular de actividade física.
O programa Adestra a Túa Saúde promove o exercicio a partir da prescrición facultativa dos centros de saúde, derivando pacientes a profesionais do deporte. Conecta esta prescrición cos recursos públicos e privados da contorna e aproveita as estruturas municipais para facilitar unha práctica próxima e sostible. Actualmente, conta con 23 unidades de atención en 30 concellos galegos, beneficiando a máis de 700 persoas a través de máis de 230 actividades en 106 instalacións.
Para o desenvolvemento deste programa, máis de 147 titulados en Ciencias da Actividade Física e do Deporte recibiron formación específica en prescrición de exercicio, e máis de 256 profesionais sanitarios tamén se formaron nesta materia.
Así mesmo, presentouse DAFIS, unha ferramenta desenvolvida pola Xunta desde 2012 para avaliar a condición física do alumnado galego. Esta plataforma permite obter información sobre os escolares, seguir a súa evolución e coñecer os seus niveis de actividade física. En 2018, a oficina europea da Organización Mundial da Saúde recoñeceuna como exemplo de boas prácticas na promoción da actividade física escolar.
