O material educativo, presentado en Aguiño, busca achegar aos máis novos á importancia da biodiversidade mariña, ás artes de pesca tradicionais e ao labor fundamental que desenvolve a xente do mar na conservación e aproveitamento sostible dos recursos mariños.
A iniciativa enmárcase no proxecto europeo Arousa-lab, que promove a colaboración entre diferentes actores vinculados ao mar e ao territorio. Na presentación participaron representantes da Consellería do Mar, patróns maiores de Aguiño, Ribeira e A Illa de Arousa, así como membros de Opmega, entidades do sector marítimo-pesqueiro e ambiental, e o director xeral de Amicos, Xoán España.
Durante a xuntanza, realizouse un balance das accións desenvolvidas e presentouse o labor de entidades como Octolarvae no estudo e restauración de especies mariñas. Tamén se incluíu unha visita ás accións de restauración de fondos mariños no Parque Nacional Marítimo-Terrestre das Illas Atlánticas.
Xoán España subliñou o compromiso das entidades participantes, destacando que "a colaboración entre actores tan diversos é o que permite que xurdan iniciativas con impacto real no territorio" para poñer en valor a cultura mariñeira e coidar o patrimonio natural.
A directora xeral de Desenvolvemento Pesqueiro, Ángeles Vázquez, resaltou a importancia de coidar o mar para garantir o futuro do sector e sinalou que "a colaboración con Amicos a través do proxecto Arousa-Lab demostra que a innovación e o coñecemento científico deben ir da man das comunidades locais".
O proxecto Arousa-Lab conta cun financiamento de 70.000 euros e intégrase no programa europeo A-AAGORA, que busca estender o coñecemento científico e a innovación cara aos axentes locais para promover prácticas sustentables e mellorar a xestión dos recursos mariños.
