A Consellería de Cultura, Lingua e Xuventude lanzou unha nova convocatoria que agrupa as axudas de gastos de edición, distribución e comercialización, as de audiolibros e as de publicación de libros en lectura fácil, tanto en formato físico como dixital. Esta iniciativa responde ás demandas do sector editorial galego.
A convocatoria, publicada hoxe no Diario Oficial de Galicia, busca unha maior eficacia e axilidade na xestión de recursos, ademais de simplificar as cargas administrativas. Como novidade, estas axudas terán un carácter bianual, ampliando o período subvencionable desde o 1 de xaneiro de 2026 ata o 30 de setembro de 2027.
Ademais, a nova orde incrementa o número máximo de solicitudes que pode presentar cada editorial, pasando de 15 a 20. Tamén se amplían os tipos de gastos subvencionables para adaptarse á nova realidade tecnolóxica e dar cobertura a máis formatos.
O obxectivo principal desta iniciativa do Goberno galego é apoiar ao sector editorial nos gastos derivados da produción, distribución e comercialización de publicacións en galego. Busca tamén incentivar a dixitalización e o acceso universal á cultura mediante a posta no mercado de audiolibros e libros en lectura fácil, ámbitos prioritarios para o fomento da lectura inclusiva.
Esta liña de axudas está aliñada cos obxectivos da Lei de cultura inclusiva e accesible de Galicia, aprobada en 2025, que xa se converteu nunha lei pioneira na Unión Europea ao desenvolver medidas para eliminar barreiras físicas, cognitivas, sociais ou territoriais.
