O Goberno autonómico, a través do Fondo Galego de Garantía Agraria (Fogga), destinará esta contía a axudas directas que se activarán canto antes, tras a recente repartición de fondos europeos por comunidades. A Galicia asignóuselle 1,6 millóns de euros da UE, que a Xunta complementa con 2 millóns de fondos propios para chegar a 4.500 agricultores e gandeiros galegos.
As axudas, que oscilarán entre 100 e 6.010 euros por beneficiario, tramitaranse con celeridade para que as explotacións poidan afrontar a tensión económica. A previsión é que os beneficiarios teñan ingresada a axuda antes de que remate o ano. A medida terá carácter horizontal e aplicarase a distintos sectores agrícolas e gandeiros, sempre que se cumpran as condicións establecidas.
Os requisitos principais inclúen estar de alta no réxime especial de traballadores autónomos (RETA) ou no sistema especial para traballadores por conta propia agrarios (SETA), obter polo menos o 25 % dos ingresos da actividade agraria e presentar a solicitude única da campaña da PAC 2026. Estímase que arredor de 4.500 persoas poderán beneficiarse destas axudas.
Os importes determinaranse segundo criterios obxectivos relacionados coa superficie agraria (secaño ou regadío, excluídos pastos). O Fogga realizará controis para verificar os sobrecustos reais e a correcta aplicación da metodoloxía de cálculo establecida polo Ministerio de Agricultura, Pesca e Alimentación.
