O evento celebrarase na Escola de Enxeñaría Industrial e conta co respaldo da International School on Environmental Applications of Advanced Oxidation Processes (IPS-AOP), unha rede científica de referencia integrada por investigadores de 25 países. A organización local está liderada por Ángeles Sanromán e Marta Pazos, investigadoras de Cintecx, co apoio do comité internacional.
O obxectivo principal é promover o intercambio de coñecementos científicos e tecnolóxicos nos procesos de oxidación avanzados (AOP) aplicados á descontaminación da auga e á protección do medio ambiente. Presentaranse os avances máis recentes e fomentarase o debate científico, promovendo a colaboración interdisciplinar entre universidades, centros de investigación e o sector industrial. Tamén se busca apoiar a formación de investigadores novos, especialmente estudantes de doutoramento.
Agárdase a participación dun centenar de asistentes, entre investigadores consolidados, estudantes de doutoramento e profesionais do sector. "Un dos principais valores deste encontro é precisamente facilitar o contacto entre especialistas de diferentes países e novas xeracións de investigadores", sinala Marta Pazos.
O evento contará con expertos internacionais como André Torres-Pinto (Universidade do Porto), Grzegorz Boczkaj (Gdansk University of Technology), Suresh Pillai (Atlantic Technological University Sligo), e nacionais como Elisa González-Romero (Universidade de Vigo), Fernando Juan Beltrán (Universidad de Extremadura), Antonio Arques (Universitat Politècnica de València), entre outros. A súa experiencia ofrecerá unha visión integral dos retos e oportunidades futuras na enxeñaría ambiental e a xestión sostible dos recursos hídricos.
O programa combinará conferencias plenarias, comunicacións científicas, sesións de pósteres, mesas redondas e actividades de debate. Ademais, realizarase unha visita técnica ás instalacións de tratamento de augas residuais e á planta potabilizadora de Aqualia en Vigo.
A 5th EPS-AOPs conta co apoio da UVigo, Cintecx, a Escola de Enxeñaría Industrial, a Escola Internacional de Doutoramento (EIDO), o Centro de Posgrao e Formación Permanente da UVigo, o Consello Social da Universidade de Vigo, Aqualia, o Concello de Vigo e a Deputación de Pontevedra.
