A iniciativa, enmarcada no programa Polos Creativos, busca fomentar a divulgación da ciencia e espertar vocacións STEM entre os estudantes galegos.
Os alumnos que superaron o programa Polos eclipsados recibiron un carné acreditativo e unhas gafas homologadas para a observación segura do fenómeno, identificándose como divulgadores científicos na súa contorna.
Para obter a acreditación, o alumnado participou nun itinerario formativo específico sobre eclipses solares e completou tres actividades obrigatorias: un cuestionario de coñecementos, o deseño dunha maqueta explicativa mediante impresión 3D e un proxecto de divulgación ou investigación.
Os centros educativos contaron con recursos didácticos específicos e materiais divulgativos, promovendo unha metodoloxía colaborativa baseada na experimentación e na aprendizaxe práctica.
Esta acreditación forma parte das máis de 26 iniciativas impulsadas pola Xunta de Galicia ao longo do pasado curso escolar para achegar a ciencia ás aulas con motivo da eclipse solar.
A Consellería de Educación destaca que o impulso á cultura científica é unha prioridade, reflectida nos resultados do alumnado galego, que lidera España en competencia científica segundo o informe PISA.
