A reitora da Universidade de Santiago, Rosa M. Crujeiras, e o secretario de Estado de Memoria Democrática, Fernando Martínez, asinaron este sábado en San Xerome un protocolo xeral de actuación. O acordo busca establecer o marco de colaboración entre ambas as institucións en materia de memoria democrática.
Esta colaboración materializarase na creación da Cátedra de Memoria Democrática, que estará dirixida polo profesor Emilio Grandío. Tamén se potenciará a divulgación da investigación que se leve a cabo na Universidade neste ámbito, achegando o coñecemento á cidadanía, especialmente ao estudantado, e promovendo a transferencia do saber.
O protocolo prevé o desenvolvemento de actividades conxuntas como a elaboración de materiais divulgativos, a organización de xornadas, conferencias ou congresos, e a produción de documentación e documentais sobre a Memoria Democrática. Ademais, promoveranse actos de dignificación do persoal da Universidade que foi depurado durante a Guerra de España e a posterior represión.
Á sinatura asistiron tamén a vicerreitora de Cultura, Lingua e Patrimonio, Ana Cabana; o delegado do Goberno en Galicia, Pedro Blanco, e a subdelegada do Goberno na Coruña, Obdulia Taboadela.
