O Foro de Empresas Innovadoras (FEI) destacou a labor de UNIRISCO, que xa suma 25 anos impulsando a innovación e a transferencia de coñecemento. A directora xeral de UNIRISCO, Inmaculada Rodríguez Cuervo, recolleu o galardón en Madrid, durante a XIV edición dos Recoñecementos FEI.
Rodríguez Cuervo subliñou que o premio pertence ás universidades galegas que hai 25 anos "tiveron a visión de apostar por un modelo de transferencia pioneiro en España", así como aos socios que apoian UNIRISCO: "empresas do tecido produtivo galego comprometidas co investimento en ciencia e tecnoloxía, que contribúen a crear empresas e emprego cualificado, impulsando o desenvolvemento económico de Galicia".
UNIRISCO foi a primeira sociedade de capital risco vinculada a proxectos universitarios e autorizada pola CNMV en 2001. O seu modelo deseñouse para acompañar a transformación de resultados de investigación e coñecemento científico en proxectos empresariais.
"Hai 25 anos, cando UNIRISCO falaba de investimento privado en spin-offs universitarias era moito menos habitual ca hoxe. Ter contribuído a construír esa cultura de transferencia é probablemente un dos nosos maiores logros", declarou Inmaculada Rodríguez Cuervo.
A entidade apoiou a creación de máis de 40 proxectos empresariais en ámbitos como biotecnoloxía e saúde, tecnoloxías dixitais, medio ambiente, dixitalización industrial ou novos materiais. Estes proxectos suman un volume de facturación de 40 millóns de euros, crearon máis de 500 empregos e máis de 150 patentes. "Actuamos como primeiro capital privado no que a ciencia se converte en produto ou servizo", explicou.
