O prazo para inscribirse na [IV Xornada Interuniversitaria Galega de Innovación Docente (XIGAID)](https://xornadas.innovacion.webs.uvigo.es/) remata o 21 de setembro. Este evento, que chega á súa cuarta edición, terá lugar na Escola Técnica Superior de Arquitectura da Universidade da Coruña e busca ser un punto de encontro para o profesorado de educación superior de toda Galicia.
Baixo o lema ‘Contextos universitarios transformadores: tecendo redes de futuro’, as xornadas pretenden fomentar o intercambio de experiencias e a creación de redes de colaboración para futuros proxectos académicos. A apertura correrá a cargo do profesor Antonio Fernández-Coca, da Universitat de les Illes Balears, cun relatorio titulado ‘A mí me pasa lo mismo. De la queja compartida a las decisiones que funcionan en el aula de hoy’, centrado en converter as preocupacións do profesorado en solucións prácticas para a docencia.
A intelixencia artificial terá un papel relevante na sección ‘InspirAcción: propostas prácticas para o traballo na aula’. Carlos Escudero (UDC) presentará ‘E agora que a IA pode facelo, que facemos nós?’, mentres que Javier Martínez (UVigo) abordará ‘¿Docencia e IA? Si, pero con sentidiño...’. Ademais, Mónica Pérez Ríos e o seu equipo (USC) compartirán a experiencia ‘Epidequé: achegando a Epidemioloxía á sociedade e ás aulas’.
A sesión vespertina estará dedicada a presentar 'pílulas de boas prácticas', onde se expoñerán experiencias de innovación desenvolvidas polos Grupos de Innovación Docente das tres universidades galegas.
Ademais da asistencia presencial, a XIGAID inclúe unha modalidade de póster virtual a través da plataforma UDCAberta. O prazo para presentar estas experiencias tamén finaliza o 21 de setembro, mentres que a inscrición para asistir ao evento de forma presencial permanecerá aberta ata o 12 de outubro.
