O Servizo Galego de Saúde, a Universidade de Santiago de Compostela, a Universidade da Coruña e a Universidade de Vigo asinaron un convenio de colaboración para establecer un protocolo común de acompañamento psicolóxico ao estudantado. Un grupo de traballo, composto por profesionais da Administración e das universidades, elaborou este documento que busca ser unha ferramenta transversal para asegurar a correcta atención e a continuidade asistencial nos recursos sanitarios e comunitarios.
A elaboración do protocolo baseouse na experiencia das unidades de atención psicolóxica das universidades galegas e na evidencia científica internacional. A integración do coñecemento experto e as mellores prácticas permitiron deseñar un documento consensuado, adaptado ás necesidades do estudantado galego e aliñado coa estrutura do Servizo Galego de Saúde.
O documento define o itinerario a seguir e actuacións complementarias como obradoiros psicoeducativos, asesoramento ao persoal universitario e promoción do coñecemento sobre os recursos dispoñibles. O interese polo benestar psicolóxico e a saúde mental do estudantado universitario incrementouse nos últimos anos a nivel global.
Unha metaanálise recente indica que o 16,78% do estudantado presenta sintomatoloxía ansiosa e o 13,42%, síntomas depresivos. Un estudo posterior á pandemia da COVID-19 sinalou que preto do 50% do estudantado universitario español presentaba problemas depresivos e unha porcentaxe similar, síntomas de ansiedade, percibindo a metade a necesidade de atención psicolóxica.
O estudantado considera que as redes de apoio adecuadas e os servizos profesionais de acceso rápido e sinxelo, xunto coa información sobre estes recursos, contribúen positivamente ao seu benestar. Na redacción do documento participaron Ana López Durán, responsable do Servizo de Atención Psicolóxica da Universidade de Santiago de Compostela, e Carmela Martínez Vispo, membro do equipo de investigación asociado a este Servizo.
