As entidades de iniciativa social teñen ata o luns para acollerse a esta convocatoria, publicada no Diario Oficial de Galicia (DOG). O obxectivo destas achegas é financiar accións en eidos como o apoio á familia e á infancia, a dinamización demográfica, a atención a persoas maiores e con discapacidade, a inclusión social, a promoción da igualdade e a prevención da violencia de xénero.
O orzamento inicial desta orde, xestionada pola Consellería de Política Social e Igualdade, é de 35,5 millóns de euros. Prevese que esta contía poida incrementarse ata os 42,4 millóns de euros, o que supón un aumento do 20% respecto ao ano anterior, unha vez que o Goberno central formalice a asignación definitiva para Galicia.
Ademais de financiar programas, as axudas tamén poden ser empregadas para investimentos en equipamentos, obras de adaptación e rehabilitación de centros, ou a adquisición de vehículos adaptados. No pasado ano, financiáronse 773 programas impulsados por 167 entidades, unha cifra que reflicte a tendencia crecente desta convocatoria desde a súa primeira edición en 2017.
