A gala final do certame, que celebrou a súa novena edición, tivo lugar este domingo no Teatro Colón da Coruña, onde se congregou un notable talento musical infantil e xuvenil. O evento destacou a capacidade dos participantes para crear música en galego, contribuíndo á promoción e difusión da lingua.

Tentáculo Rock está composto por Carlos Nieto (voz, batería e piano), Leo Figueiras (guitarra), Lois García (baixo) e Martiño Ramos (voz e batería). Os tres primeiros coñecéronse en 2017 na escola unitaria A Igrexa de Ortoño, en Ames, formando inicialmente o grupo TríoR. En 2025, coa incorporación de Martiño, a formación transformouse no actual Tentáculo Rock.

O premio para os gañadores inclúe a gravación dunha maqueta en estudo profesional e un videoclip do tema vencedor, ademais de material musical ou produtos culturais en galego por un valor de 1.500 €. Na mesma categoría infantil, o segundo posto foi para O mar dos sentimentos, do CEIP de Caión (A Laracha), coa canción Nada pode pararme, mentres que Libres, do CEIP Plurilingüe Irmáns Villar de Ourense, quedou en terceiro lugar con Quero brillar coma ti.

Na categoría xuvenil, o grupo vigués Noxem, coa peza Espertar, resultou gañador. O seu premio tamén inclúe a gravación dunha maqueta e un videoclip, ademais dun programa formativo e material musical ou cultural por 1.500 €. A responsable da área de Cultura da Deputación da Coruña, Natividade González Rodríguez, subliñou o compromiso da institución con este concurso, que en 2027 celebrará o seu décimo aniversario.