O Concello de Teo confirmou a presenza de técnicos da administración local, da Deputación coruñesa e da Xunta no entorno dos petróglifos e as mámoas de Monte Piquiño. Estes elementos arqueolóxicos resultaron danados polo lume forestal que se orixinou en Padrón e que se estendeu ata Lampai. O obxectivo é avaliar os danos para poder recuperar esta importante necrópole megalítica e o seu contido de arte rupestre.
A alcaldesa de Teo, Lucía Calvo de la Uz, solicitou formalmente ao director xeral de Patrimonio Cultural, Ángel Miramontes, celeridade na avaliación dos danos. Tras esta análise, o Goberno autonómico emitirá un informe que determinará as medidas necesarias para a recuperación da zona, considerada unha das áreas arqueolóxicas máis relevantes de Galicia e a máis importante da comarca de Compostela.
Ademais dos danos no patrimonio arqueolóxico, tamén se viron afectados os paneis informativos e a propia ruta homologada. A rexedora destacou a importancia da colaboración entre administracións para salvagardar o patrimonio e agradeceu a rápida resposta da Xunta de Galicia á súa petición.
A asociación cultural A Rula tamén confirmou que o incendio forestal danou Monte Piquiño, unha área protexida de 40 hectáreas entre as parroquias teenses de Lampai, Luou e Rarís. Catalogáronse 33 mámoas e 11 petróglifos, ademais da Ruta homologada dos Petróglifos de Teo (PRG-238). Estímase que aproximadamente un terzo da zona quedou afectada polas lapas.
Dende A Rula alertaron que algunhas mámoas sufriron danos graves, non polo lume directamente, senón polas devasas realizadas polos brigadistas. Tamén se viu afectado o petróglifo do Fondao, aínda que o anel de protección e o mantemento da ruta polo Concello de Teo puideron evitar maiores danos nesa estación rupestre. Aconsellan non transitar pola área afectada ata que se garanta a seguridade, e suxiren que existen medios para evitar este tipo de destrozos.
O Concello de Teo, en resposta a estes riscos, comunicou o peche da ruta de acceso á zona para visitantes. Esta medida permanecerá vixente ata que o espazo sexa reacondicionado e se poida garantir a seguridade para todas as persoas usuarias.
