A Confederación Española de Policía (CEP) e a Asociación Española de Guardias Civiles (AEGC) aproveitaron a súa concentración en Lugo, enmarcada na denominada «Marcha pola Dignidade Policial», para denunciar un notable incremento da criminalidade en Galicia durante os últimos anos e reclamar un reforzo urxente de medios humanos e materiais para as forzas e corpos de seguridade.
Segundo os datos achegados por ambas as organizacións, a criminalidade total en Galicia aumentou máis dun 20% entre os anos 2019 e 2025. Unhas cifras que contrastan coas ofrecidas recentemente polo delegado do Goberno en Galicia, quen sinalou este mesmo mes que a delincuencia descendeu un 1,9% en termos interanuais e en relación co número de habitantes.
Os representantes policiais sosteñen que algúns indicadores reflicten unha evolución especialmente preocupante. Entre eles destacan os homicidios e asasinatos consumados ou en grao de tentativa, que experimentarían un incremento próximo ao 83% nos últimos seis anos.
Tamén alertan do crecemento da denominada violencia na rúa, que inclúe delitos como lesións graves e liortas tumultuarias, cunha suba do 45,7%, así como do aumento dos delitos contra a liberdade sexual, que se incrementarían máis dun 53%.
Dentro desta categoría, as agresións sexuais con penetración rexistran, segundo os sindicatos policiais, un crecemento superior ao 75%.
Outro dos fenómenos que máis preocupa a CEP e AEGC é a expansión da ciberdelincuencia. De acordo cos datos expostos durante a mobilización, este tipo de delitos aumentou máis dun 120% en Galicia dende 2019, converténdose nunha das modalidades delitivas con maior crecemento.
As organizacións tamén puxeron o foco nas agresións sufridas por funcionarios públicos, unha categoría que inclúe os axentes das forzas de seguridade. Segundo as súas cifras, estes ataques incrementáronse un 12,71% dende 2021, o que equivalería a unha media de aproximadamente tres agresións cada dous días durante o ano 2025.
