As licitacións, publicadas no Portal de Contratos Públicos de Galicia, destinan 119.790 euros (IVE incluído) a cada un dos equipos. Un deles será para o Hospital Naval do Complexo Hospitalario Universitario de Ferrol, mentres que o segundo, un equipo radiocirúrxico dixital portátil para fluoroscopia, destinarase ao bloque cirúrxico do Hospital Arquitecto Marcide.
As empresas interesadas teñen ata o 4 de novembro para presentar as súas ofertas. Ambos os equipos deberán cumprir coa normativa vixente en materia de calidade en radiodiagnóstico, protección radiolóxica e integración informática, asegurando a optimización das imaxes e tratamentos, así como a protección das persoas fronte ás radiacións ionizantes.
No caso do equipo de radioloxía dixital portátil, o contrato inclúe a instalación, configuración, posta en funcionamento, subministración de hardware e software, e o mantemento. Trátase dun sistema compacto deseñado para o seu fácil desprazamento e uso en calquera dependencia do Hospital Naval.
O equipo radiocirúrxico dixital portátil para o ámbito cirúrxico contará cun xerador de alta frecuencia con modo de fluoroscopia continua e pulsada, e radiografía dixital. O arco en C terá un espazo libre de polo menos 75 centímetros entre o tubo e o detector, e este último será dixital.
