O obxectivo é resolver de xeito continuado, rápido e eficiente as consultas, incidencias e avarías que poidan producirse no labor habitual dos traballadores dos centros hospitalarios. As unidades de tecnoloxías da información dos distintos centros sanitarios teñen entre as súas misións garantir a correcta atención aos usuarios das infraestruturas informáticas básicas e dos sistemas de información corporativos, un pilar fundamental para soster a actividade dixital e garantir a confianza dos profesionais.
A dixitalización da actividade asistencial na rede hospitalaria do Servizo Galego de Saúde é unha realidade consolidada. Por iso, é crucial garantir a calidade do servizo de atención ao elevado número de profesionais que utilizan os sistemas de información nos centros hospitalarios de cada área sanitaria.
O período de vixencia inicial do contrato é de 12 meses. Non obstante, o prazo máximo de duración, coas posibles prórrogas, será de 5 anos, elevando o seu orzamento estimado ata os 11.871.641 euros.
Entre os servizos incluídos neste contrato atópanse as consultas e solicitudes, peticións de desenvolvemento de programas informáticos, xestión de incidencias, cambios en aplicacións, instalación e configuración de hardware e software, accións preventivas programadas e a implantación de novas aplicacións.
Unha das novidades máis destacadas é o incremento do número máximo de usuarios atendidos por área sanitaria, que pasa de entre 4.500 e 7.000 a entre 12.500 e 15.000. Ademais, amplíase o catálogo de aplicacións obxecto de soporte, de 150 a 200 sistemas.
Desde o punto de vista técnico, refórzanse os requisitos de seguridade coa esixencia expresa de certificacións ISO 9001, ISO 27001 e o Esquema Nacional de Seguridade. Tamén se introducen novos mecanismos de seguimento e control, con obrigas específicas de informes, integración co sistema corporativo de xestión da calidade e penalizacións asociadas ao incumprimento.
