Un total de 19 profesionais do Servizo Galego de Saúde (Sergas) xa contan con vínculo fixo como persoal estatutario neste organismo autónomo e foron nomeados como persoal estatutario fixo na categoría de médico de hospitalización a domicilio. A resolución foi publicada hoxe no Diario Oficial de Galicia (DOG).
Os destinos destes profesionais distribúense en varios complexos hospitalarios e hospitais públicos das sete áreas sanitarias de Galicia. En concreto, as prazas adxudicadas son: Complexo Hospitalario Universitario de Vigo (1); Complexo Hospitalario Universitario de Ferrol (1); Complexo Hospitalario Universitario de Santiago de Compostela (2); Hospital Público da Mariña (3); Hospital Universitario Lucus Augusti (4); Hospital Público do Salnés (1); Hospital Público de Barbanza (1); Complexo Hospitalario Universitario da Coruña (3); e Complexo Hospitalario Universitario de Ourense (3).
Este procedemento de acceso á categoría de médico de hospitalización a domicilio realízase en base ao Decreto 34/2021, do 11 de febreiro, que establece un procedemento específico para o ingreso nesta categoría. Esta normativa desprégase en aplicación do artigo 34 da Lei 55/2003, do Estatuto marco do persoal estatutario dos servizos de saúde, e do artigo 25.3 do Decreto 206/2005, sobre provisión de prazas de persoal estatutario do Sergas.
O Decreto 34/2021 prevé unha convocatoria diferenciada para o acceso, mediante concurso, á categoría e ás prazas concretas de médico de hospitalización a domicilio. Esta convocatoria está aberta a persoal licenciado ou graduado universitario en medicina, con título oficial de médico especialista e vínculo de fixeza, que estea a desempeñar ou xa desempeñase funcións propias desta categoría no Servizo Galego de Saúde.
