O proceso de adxudicación de prazas de Formación Profesional concentrarase en xullo, cun calendario que inclúe ata tres convocatorias e un sistema de adxudicación continua para as vacantes restantes.

As persoas interesadas poderán optar a algunha das 50.224 prazas dispoñibles nalgún dos 277 ciclos ofertados. As solicitudes presentaranse durante toda a segunda quincena de xuño.

A primeira adxudicación de prazas publicarase o 10 de xullo, cun prazo de matrícula do 10 ao 15. A segunda adxudicación está prevista para o 20 de xullo (matrícula do 20 ao 23), e a terceira para o 27 de xullo (matrícula do 27 ao 29).

Posteriormente, os ciclos con vacantes sen cubrir entrarán nun sistema de adxudicación continua, onde cada centro chamará á lista de espera para formalizar matrículas. O conselleiro destacou a oferta como «ampla e variada», asegurando que «calquera que o desexe, pode atopar un oco en FP».

A presenza da FP galega en Salimat Abanca 2026 serviu tamén como escaparate da actividade dos centros de Hostalaría, Turismo e Industrias Alimentarias. Instalouse un espazo informativo sobre a oferta formativa, orientación e saídas laborais.

Alumnado de centros como o Paseo das Pontes (A Coruña), Fraga do Eume (Pontedeume) e Vilamarín (Ourense), xunto co Instituto Sanxillao (Lugo), participou en actividades de demostración e degustación, conectando centros educativos, produtores e empresas do sector.