A avaliación de Historia de España na Proba de Acceso á Universidade (PAU) en Galicia continúa xerando malestar entre o alumnado e o profesorado. Despois de que a Comisión Interuniversitaria de Galicia (CiUG) anunciase unha flexibilización na corrección dun apartado relacionado co movemento obreiro e o anarquismo, ante a crítica pola súa formulación, docentes de polo menos dous institutos galegos alertan agora doutros posibles erros na proba.

Os profesores, que xa trasladaron formalmente as súas reclamacións á CiUG, non só piden que os "erros na formulación" das cuestións non prexudiquen a cualificación final dos estudantes, senón que tamén solicitan o cesamento da persoa responsable do grupo de traballo de Historia na CiUG. Esta demanda prodúcese nun contexto similar ao da proba de Debuxo Técnico, onde tamén se detectaron múltiples erros.

Dende os departamentos de Xeografía e Historia de institutos como o IES Virxe do Mar (Noia) e o IES Leliadoura (Ribeira), censuran, ademais da pregunta sobre o movemento obreiro no século XIX, a formulación da cuestión 4.2. Esta cuestión requiría a análise dunha táboa de datos sobre investimentos públicos en sanidade, educación e pensións entre 1975 e 1980, unha táboa que, segundo os docentes, "excede os contidos a desenvolver en segundo de Bacharelato" e non se axusta ás recomendacións establecidas.

Os reclamantes argumentan que non se pode esperar que o alumnado teña que adaptarse a cambios de criterios de corrección "sobre a marcha", cualificando estas modificacións como un "desprezo" ao seu traballo. Urxen á CiUG a dar instrucións claras aos correctores para que os erros non afecten negativamente as notas, tanto das preguntas do século XIX como do XX, e instan a tomar medidas respecto á persoa responsable do grupo de traballo pola "gravedade dos erros cometidos", que poderían indicar "un total descoñecemento" ou "unha grave neglixencia".

Ademais, fan un chamamento á CiUG para que garanta que non se repita unha situación similar na convocatoria extraordinaria.