Despois de celebrar a súa segunda edición en Vigo, o evento que combina artistas consolidados e novas promesas do panorama musical urbano, retorna á cidade que o viu nacer. A organización do festival fixo pública a noticia este mércores a través das súas redes sociais, empregando a frase “Volvemos ao noso inicio, Santiago de Compostela”.

Aínda que non se desvelaron todos os detalles, xa se coñece a data e o lugar para esta nova entrega do Lingua Urbana Fest. A Cidade da Cultura acollerá o evento o 28 de agosto, prometendo unha xornada dedicada á música urbana.

Na súa primeira edición, o festival destacou por un cartel ambicioso que incluía a Hard GZ, un dos referentes do xénero con millóns de oíntes mensuais en Spotify. Tamén participaron grupos como Disobey e talentos emerxentes como Mvrk ou Jonh Pollón, ademais de representación galega con artistas como Boyanka Kostova e 9Louro. A segunda edición, celebrada o 27 de marzo no Instituto Ferial de Vigo (IFEVI), contou con nomes como La Pantera, C.Marí, Lorna, Metrika, Sticki M.A, 9louro e West SRK.

Os seguidores do festival deberán estar atentos ás redes sociais oficiais para coñecer os artistas que conformarán o cartel desta terceira edición na Cidade da Cultura.