A terceira edición do Festival do Mar de Marín non poderá inaugurarse no esperado Auditorio, tal e como se anunciara inicialmente. As probas de seguridade do edificio obrigaron á organización, o Museo do Mar, a buscar novas localizacións para as actividades programadas. Esta decisión tamén afecta a outros eventos municipais, como a Gala do Deporte.
O cambio de sedes anunciouse este martes durante a presentación do festival, á que asistiron membros da Asociación polo Museo do Mar e a concelleira Marián Sanmartín. O evento, xa consolidado como unha cita cultural de referencia en Galicia, céntrase na relación entre o audiovisual, o mar e a identidade cultural.
A programación, diversa e internacional, inclúe proxeccións cinematográficas, actividades formativas e encontros profesionais. O luns 20 de abril, ás 19:30 horas, o Cine Seixo acollerá a inauguración coa presentación do xornalista Carlos Prado e a entrega do Premio Honorífico 'Luz de Faro' ao actor e humorista Carlos Blanco. A continuación, proxectarase a película Rondallas de Daniel Sánchez Arévalo.
Do martes ao sábado, a Biblioteca Vidal Pazos será o epicentro de moitas actividades. O martes, ás 18:00 horas, comezará a Sección Ensino coa participación de centros educativos como o CEIP Ardán, CEIP de Seixo, CEIP Sequelo de Marín, o CEIP Reibón de Moaña, o CEIP Torre de Hércules da Coruña e o IES Ramón Cabanillas de Cambados.
A Sección Oficial Documental proxectará títulos como A tarefa e Un mar de mulleres, seguida dunha mesa redonda sobre as mulleres do mar e o marisqueo, con participantes como Sandra Amezaga (Mulleres Salgadas), Marina Buceta (Asociación de Mulleres do Mar de Poio) e Rita Míguez (Mariscadoras de Arcade), moderada pola bióloga Rita Pesqueira.
O mércores e o xoves, a partir das 19:00 horas, continuará a Sección Oficial Documental con filmes como La mé a nan san, Si el silencio fuera azul, Parangol, El nom de les flors, Polbeiros e Mar, sol, vent. A Sección Oficial de Ficción presentará Buelta eta buelta, Chec-out, Bajamar, Inés, El pasajero, Ultramarino e Nas ondas do tempo. Ambos os días rematarán con charlas sobre 'Os cetáceos nas Rías Baixas' a cargo de Alfredo López (biólogo mariño do CEMMA) e mesas redondas sobre 'A creación audiovisual en Galicia'.
O venres pola mañá, a Escola de Cine e Mar acollerá proxeccións para escolares, e pola tarde, a Sección Oficial de Ficción mostrará Fenicia e Memòrias com vista pro mar. O filme de clausura, San Simón, contará coa presenza do seu director, Miguel A. Delgado, o actor marinense Celestino Fuentes e a Asociación pola Recuperación da Memoria Histórica de Marín.
O sábado pola mañá, o Espazo Emprendedor do Parque Azul acollerá un showcooking 'Galicia sabe a mar' co chef Marcos S. Area do é Restaurante de Marín. O domingo, como colofón, realizarase unha visita á Illa de San Simón.
A entrega de premios, incluíndo os Sardiña de Ouro, Rañorte de Ouro, Polbo de Ouro e Rodaballo de Ouro, así como o galardón do II Certame de Fotografía do Mar, terá lugar o sábado 25 de abril ás 19:30 horas na Biblioteca Municipal. As fotografías finalistas exporanse no Museo Manuel Torres. O festival recibiu máis de 300 filmes, avaliados por Anxos Fazáns, Nati Juncal Portas e Gaspar Broullón.
