A conselleira do Medio Rural, María José Gómez, destacou hoxe a aposta da Xunta de Galicia por reforzar a dotación de medios aéreos empregados na extinción de incendios forestais durante a súa visita á base aérea de Queimadelos, situada no concello pontevedrés de Mondariz.
Gómez, acompañada polo director xeral de Defensa do Monte, Manuel Francisco, e polo equipo do Servizo de Prevención e Defensa contra os Incendios Forestais (SPIF), lembrou que mañá mesmo estará operativo o novo avión de coordinación e vixilancia, o ‘Xunta 23 ACO’. Esta aeronave, a primeira deste tipo na comunidade, sumarase aos dous helicópteros de coordinación xa existentes e situados en Silleda e Portomarín.
O avión ‘Xunta 23 ACO’, que se situará na base aérea de Verín-Oímbra, permitirá unha mellor coordinación cando haxa acumulación de medios aéreos traballando. Ademais, dous técnicos encargaranse da análise e avaliación continua do incendio, apoiando ao persoal de terra, grazas á autonomía de 4 horas da aeronave.
A Xunta tamén vén de contratar dous novos avións de carga en terra e un helicóptero pesado. En total, son 24 os medios dependentes da Consellería do Medio Rural, que se suman aos do Goberno central, sumando preto de 30 medios aéreos.
Este compromiso implica un aumento do orzamento destinado a este eido, que no ano 2026 ascende ata os 19,56 millóns de euros, o que supón un incremento de 3,7 millóns en relación co exercicio anterior.
