A Fundación Andrea, a física compostelá Mar Capeáns, o trompetista Esteban Batallán, o atleta Adrián Ben e a empresaria María Barallobre son as personalidades e entidades que recibirán as Medallas Castelao este ano. A entrega dos galardóns terá lugar o vindeiro domingo, 28 de xuño, nun acto que se celebrará na Igrexa de San Domingos de Bonaval, en Santiago de Compostela.
A Fundación Andrea, creada por Charo Barca en memoria da súa filla Andrea, ofrece apoio integral a familias con menores que padecen enfermidades crónicas. A entidade, situada preto do Hospital Clínico de Santiago, dispón de aloxamentos adaptados e colabora co Sergas na humanización das urxencias pediátricas.
Esteban Batallán Cons, trompetista natural de Barro (Pontevedra), é recoñecido pola súa traxectoria internacional, que o levou a ser trompetista principal en orquestras de Chicago e Hong Kong. Actualmente, imparte clases na Universidade DePaul de Chicago.
Mar Capeáns, física compostelá, é distinguida pola súa influencia científica a nivel mundial, chegando a ser xefa de operacións na Organización Europea para a Investigación Nuclear (CERN). Conta con máis de 500 artigos publicados e participa en programas internacionais de física de partículas e da Comisión Europea.
O atleta Adrián Ben, especializado en carreiras de medio fondo e natural de Viveiro (Lugo), obtivo o diploma olímpico en Tokio 2020 e proclamouse campión de Europa en pista cuberta en 2023 nos 800 metros. Recentemente, foi subcampión de España en 1.500 metros.
Finalmente, María Barallobre, propietaria dos restaurantes A Penela, é recoñecida pola súa contribución á gastronomía galega. Iniciou o seu proxecto en Coirós (A Coruña) e expandiuno a cidades como A Coruña, Madrid, Barcelona e París.
