O titular de Sanidade, Antonio Gómez Caamaño, reiterou as súas críticas á actitude do Ministerio de Sanidad, ante o que percibe unha "absoluta parálise" para finalizar as folgas convocadas contra a reforma do Estatuto Marco.
Tras unha reunión telemática cos xerentes das sete áreas sanitarias do Sergas, o conselleiro detallou que se suspenderon 5.758 cirurxías, 156.168 consultas hospitalarias, 91.365 consultas de atención primaria e 17.553 probas.
“"Fago un novo chamamento ao Goberno central para tentar atallar estas folgas que están a supoñer unha sangría nas listas de espera de todas as comunidades autónomas. Necesitamos un pouco de responsabilidade e sensibilidade cara aos pacientes que están detrás desas suspensións."
Gómez Caamaño expresou a súa preocupación polo impacto que os paros terán nas listas de espera, especialmente se a folga se volve indefinida tras o verán, tal como advertiu o comité de folga ante a falta de avances nas negociacións.
O conselleiro tamén achegou datos do seguimento da folga para este venres, última xornada da semana, cun respaldo medio do 18,15% no turno de mañá, lixeiramente superior á media da semana (arredor do 15%). Detallou que cada día se suspenderon unhas 150 cirurxías, 5.000 consultas hospitalarias, 1.100 de primaria e 1.200 probas.
Por centros hospitalarios, o seguimento variou: 23,90% no Complexo Hospitalario Universitario de A Coruña; 24,12% no de Compostela; 18,24% no de Ferrol; 23,47% no Hospital Universitario Lucus Augusti; 26,89% no Complexo Hospitalario Universitario de Ourense; 25,67% no de Pontevedra; e 29,61% no de Vigo.
