A conselleira de Economía e Industria, María Jesús Lorenzana, convidou hoxe a Thune Eureka a sumarse á Iniciativa Estratéxica de Seguridade, Defensa e Aeroespazo (Iesda). Esta iniciativa ten aberta unha convocatoria de acordos de asociación cun orzamento de 40 millóns de euros, co obxectivo de conformar consorcios empresariais que desenvolvan e fabriquen en Galicia produtos ou servizos neste ámbito.
Lorenzana explicou que se está a traballar coas empresas galegas con capacidade para incorporarse a este sector. A conselleira realizou unha visita ás instalacións da compañía para estudar as posibilidades de que participe nesta convocatoria, cualificándoa como “o instrumento máis potente que ten a estratexia”, cun prazo aberto ata o vindeiro 30 de setembro.
A conselleira tamén sinalou que Thune Eureka xa foi beneficiaria dunha liña de apoios da Iesda para certificacións, que contou cun orzamento de 1,5 millóns de euros. Deste xeito, a Xunta busca “apoiar o empresariado galego para que, pouco a pouco, vaia entrando neste mundo, ás veces, complicado para as empresas do ámbito civil”.
Con máis de 50 anos de historia, Thune Eureka está especializada na fabricación de equipos e compoñentes para diversos sectores como o da construción naval, o offshore, a industria frigorífica ou o sector da defensa. Lorenzana destacou que a compañía é “unha mostra máis desas empresas familiares que, desde Galicia, son quen de chegar a todo o mundo”.
