A xerente da Fundación Artesanía de Galicia, Elena Fabeiro, visitou o mercado ‘Sabor a Novo’ en Santiago para apoiar os trece obradoiros de Artesanía de Galicia presentes no evento. Destacou a especialización destes obradoiros en disciplinas como o debuxo, bixutería, talla e xoguetes de madeira, marroquinería, xoiería, cerería, complementos de moda, encaixe e cerámica.
A visita tamén serviu para lembrar a posta en marcha dunha nova liña de axudas, dotada cun orzamento de 1 millón de euros, destinada a incentivar contratos formativos de aprendices en oficios tradicionais. O prazo de solicitude para estas axudas, que subvencionarán contratos a xornada completa durante un mínimo de 12 meses en obradoiros inscritos en Artesanía de Galicia, permanecerá aberto ata o vindeiro 30 de setembro ou ata esgotar o crédito.
O mercado ‘Sabor a Novo’, que se celebra hoxe e mañá en horario de 11,00 a 21,00 horas, conta co apoio da Xunta co obxectivo de promover a comercialización e divulgación do sector artesán galego, adaptándose ás novas fórmulas de venda e aos hábitos de consumo actuais.
Entre os participantes atópanse obradoiros como Sandraguilar (Baiona), Artesanía Nia (Neda), Enxógate (Quiroga), Tres Caracoles (Lugo), Pekenajoya (Culleredo), Luciérnaga (Barbadás), Escola obradoiro de Ana Rosa (Ames) e Arual Ecology (Vilagarcía de Arousa). De Santiago son El Rocío de Santiago, Ilex Talla, BJ CandleStudio, Brazolinda e Michelle Volpe Cerámica. Algúns destes obradoiros realizarán demostracións dos seus oficios.
